• ဆက်သွယ်ရန်•  မြန်မာဘာသာဌာနအကြောင်း
   

ဂုဏ်ယူဝင့်ထည် ကွမ်ရှီးပြည်နယ်

(GMT+08:00) 2018-12-10 14:58:13

      တရုတ်နိုင်ငံ၊ ကွမ်ရှီးကျွမ့်လူမျိုး ကိုယ်ပိုင်အုပ်ချုပ်ခွင့်ရဒေသ တည်ထောင်ခြင်းဟာဆိုရင် အခုနှစ်မှာ နှစ် (၆၀)ပြည့်ခဲ့ပါပြီ။ နှစ် (၆၀)တိုင်တိုင် သာယာလှပနေပြီး ဂုဏ်ယူဝင့်ထည်ရပါသော ကွမ်ရှီးပြည်နယ်ရဲ့ သမိုင်းတွင်တဲ့ နှစ် (၆၀)ကို ဂုဏ်ပြုတဲ့အနေနဲ့ ကွမ်ရှီးပြည်နယ်၊ ကွမ်ရှီးတိုင်းရင်းသားလူမျိုးစု တက္ကသိုလ်မှာ မြန်မာစာဘာသာရပ်ကို လာရောက်သင်ကြားပြသပေးနေသူ ဆရာမ ဒေါ်ဝတီသွင်ကို CRI အသံလွှင့် အစီအစဉ်ကနေ အခုလိုမျိုး ဆက်သွယ်မေးမြန်းထားပါတယ်။

မေး - ဆရာမ မင်္ဂလာပါရှင်။

ဖြေ  - ဟုတ်ကဲ့ပါ။

မေး - ဆရာမနာမည်နဲ့ မြန်မာနိုင်ငံဘယ်ကနေ လာရောက်တယ် .. ပြီးတော့ ကွမ်ရှီးပြည်နယ်ကို ဘယ်ခုနှစ်ထဲကရောက်ရှိခဲ့တာလဲဆိုတာ အရင်ဦးဆုံးမိတ်ဆက်ပေးပါဦးရှင်။

ဖြေ  - ကျွန်မရဲ့နာမည်က ဒေါ်ဝတီသွင်ပါ။ ရန်ကုန်ကပဲလာပါတယ်။ အရင်က ကျွန်မက ရန်ကုန် နိုင်ငံခြားဘာသာတက္ကသိုလ်၊ မြန်မာဘာသာဌာနမှာ ဆရာမတစ်ယောက်အနေနဲ့ တာဝန်ထမ်းဆောင်ခဲ့တာပါ။ ၂၀၀၈ ခုနှစ်မှာ ကျွန်မ အလုပ်ကနေ အနားယူပြီးတော့မှ ဒီ ကွမ်ရှီးပြည်နယ် ကွမ်းရှီးတိုင်းရင်းသားလူမျိုးစု တက္ကသိုလ်က တပည့်ဟောင်းတွေက ခေါ်လို့ ဒီကိုရောက်လာတာပါ။

မေး - ဟုတ်ကဲ့ပါဆရာမ..ဒီတော့ ဆရာမအနေနဲ့ ကွမ်ရှီးပြည်နယ်အကြောင်း ဆရာမသိသလောက် ပြောပြပေးပါဦးရှင်။

ဖြေ  - ကျွန်မ ဒီမှာနေတာ (၁၀)နှစ်ရှိသွားပြီဆိုတော့လေ ကွမ်ရှီးရဲ့နေရာဒေသတော်တော်များများလည်း ရောက်တာပေါ့။ ကွမ်ရှီးမှာရှိတဲ့ ယဉ်ကျေးမှုဓလေ့ထုံးစံတွေလည်း တော်တော်များများ သိတာပေါ့။ ကျွန်မ ရောက်တဲ့အချိန် (၂၀၀၈)ခု အောက်တိုဘာ၊ နိုဝင်ဘာ၊ ဒီဇင်ဘာလောက်ပေါ့နော် အဲဒီအချိန်မှာဘဲ ကွမ်ရှီးပြည်နယ်ရဲ့ နှစ် (၅၀)ပြည့် အခမ်းအနားနဲ့ စပြီးတွေ့ရတာလေ။ အခု နှစ် (၆၀)မြောက်ပေါ့နော်။ ကွမ်ရှီးပြည်နယ်က တရုတ်ပြည်ရဲ့တောင်ဘက်ပိုင်းမှာရှိတဲ့ ပြည်နယ်တစ်ခုပေါ့နော်။ ဗီယက်နမ်နဲ့လည်း ဆက်သွယ်နေတဲ့ဒေသတစ်ခုလေ။ ပြီးတဲ့အခါ ယူနန်နဲ့လည်း ဆက်နေတာပေါ့နော်။ အဲဒီအခါကျတော့ မြန်မာနိုင်ငံနဲ့ တော်တော်နီးတယ်။ လတ္တီတွဒ်၊ လောင်ဂျီတွဒ်တွေနဲ့ပြောရမယ်ဆိုရင် ကချင်ပြည်နယ်နဲ့တစ်တန်းထဲလောက်မှာရှိတယ်လို့ တပည့်တွေက ပြောကြပါတယ်။

မေး - ဟုတ်ကဲ့ပါ..ဒီ ကွမ်ရှီးပြည်နယ်ဟာဆိုရင် သာယာလှပပြီး နေချင်စဖွယ်ဖြစ်တဲ့ပြည်နယ်တစ်ခု ဖြစ်တယ်လို့ပြောကြပါတယ်။ ဘယ်လိုနေချင်စဖွယ် ကောင်းတယ်ဆိုတာကို ပြောပြပေးပါဦးဆရာမရှင်။

ဖြေ  - ဟုတ်ကဲ့ပါ..ကျွန်မနေတာက နန်နင်းမြို့တော်ပေါ့နော်။ ကျွန်မနေတဲ့ကျောင်းကတော့ ကွမ်ရှီးတိုင်းရင်းသားလူမျိုးစုတက္ကသိုလ်လို့ ခေါ်ပါတယ်။ အဲဒီနေရာဒေသကို စရောက်ကတည်းက ကွမ်ရှိးပြည်နယ်ရဲ့မြို့တော် နန်နင်းမြို့ဆိုတာထက် ဒီကျောင်းရဲ့ဧရိယာလေးက တစ်ကယ့်ကို သစ်တောလေး တစ်တောနဲ့သိပ်တူပါတယ်။ စိမ်းလန်းစိုပြည်တယ်ပေါ့နော်။ ရာသီဥတုကလည်း မိုးရေချိန်လည်းရတယ်။ နေရောင်ခြည်လည်းရတယ်ဆိုတော့ တော်တော်ကို စိမ်းလန်းစိုပြည်တဲ့မြို့တော်ပါ။ ဒါ့ကြောင့်မို့လို့ နန်နင်းမြို့ကိုလည်း တရုတ်နိုင်ငံရဲ့ စိမ်းလန်းမြို့တော်လို့ခေါ်ကြတယ်။

       နောက်ပြီးတော့ ကျွန်မ ဒီမှာနေတဲ့အခါ မြို့ထဲမှာဘဲဖြစ်ဖြစ် ဒီပြည်နယ်ထဲမှာဘဲဖြစ်ဖြစ် လျှောက်ပြီးတော့ လည်တာတွေ ရှိတယ်ပေါ့နော်။ ကျောင်းပိတ်ရက်တွေဘာတွေမှာ လျှောက်လည်တဲ့အခါ တကယ်ကိုစိုပြည်ပါတယ်။ လှပသာယာရေးနဲ့ စိမ်းလန်းစိုပြည်ရေးကို တကယ်ဂရုစိုက်တယ်။ ပတ်ဝန်းကျင် ညစ်ညမ်းမှုကိုလည်း တော်တော်ကိုဂရုစိုက်ပြီးတော့ သစ်ပင်တွေနဲ့စိမ်းလန်းမှုတွေနဲ့ထိန်းထားတယ်။ နောက်ပြီးတော့ ကွမ်ရှီးမှာနာမည်အကြီးဆုံးက ကွေ့လင်ပေါ့နော်။ အဲဒီမှာရှိတဲ့လင်ကျန်းမြစ် သိပ်ကိုသာယာလှပ ပါတယ်။ အရင်တုန်းကတော့ အဲဒီနေရာတွေဟာ စက်မှုဇုန်တွေလုပ်ပြီးတော့ တော်တော်ကို ထိခိုက်သွားသေးတယ်။ နောက်ပိုင်းကျတော့မှ တိမ်းရှောင်ဖိန်က ဒီကိုလာရင်းနဲ့ တွေ့သွားပြီးတဲ့အခါ ဟာ..ဒီလိုမျိုး လှပတဲ့ သဘာဝရေမြေတောတောင်တွေကို ပျက်စီးအောင် မလုပ်သင့်ဘူးဆိုတော့မှ သူတို့ပြန်ပြီးတော့ ထိန်းသိမ်းပြီးလုပ်လိုက်တဲ့အခါ တော်တော်ကောင်းသွားပြီးတော့ ဒီနေရာတွေဟာ Tourist Attraction ပေါ့။ နိုင်ငံခြားသားတွေ အများကြီးလာကြတယ်။ တရုတ်လူမျိုးတွေလည်း အမြဲတမ်းလာတဲ့နေရာ တစ်ခုဖြစ်လာတယ်။ အဲဒီကွေ့လင်ကတော့ တကယ်အလှဆုံးပါပဲ။ သူတို့ ဘယ်လိုတင်စားပြီးပြောလဲဆိုရင် ဒီကွေ့လင်မှာရှိတဲ့ ရှုခင်းတွေရဲ့ သာယာလှပမှုတွေဟာ ကမ္ဘာပေါ်မှာ သူနဲ့တူတဲ့နေရာတစ်ခုမရှိနိုင်ပါဘူးတဲ့ အဲဒီလိုတောင် တင်စားပြီးပြောကြပါတယ်။

မေး - ဟုတ်ကဲ့ပါဆရာမ..ဒီလိုသာယာလှပတဲ့နေရာတွေရှိတော့ ခရီးသွားလာမှုလုပ်ငန်းတွေကိုရော သူတို့ အနေနဲ့ ဘယ်လိုဆောင်ရွက်မှုတွေရှိတယ်ဆိုတာကို ပြောပြပေးပါဦးဆရာမရှင်။

ဖြေ  - ခရီးသွားလုပ်ငန်းအနေနဲ့ သူတို့က ဒီနေရာမှာ တော်တော်ကိုတိုးတက်တယ်။ တော်တော်လည်း သူတို့ကြိုးစားပြီးတော့ လုပ်တယ်။ အဲဒီလိုပတ်ဝန်းကျင်သာယာလှပတာကိုမှ သူတို့က လူတွေလာပြီး လေ့လာ နိုင်အောင် လေ့လာချင်စိတ်ဖြစ်အောင် အများကြီးစွဲဆောင်မှုတွေလုပ်ထားပါတယ်။ ဘာဖြစ်လို့လဲဆိုတော့ ကျွန်မတို့ကျောင်းထဲမှာတောင်မှ    Tourism နဲ့ပတ်သက်တဲ့ ခရီးသွားနဲ့ပတ်သက်တဲ့ ကောလိပ်တွေရှိတယ်။ နောက် အထူးသဖြင့်ရှိတာ ကွေ့လင်မြို့ပေါ့နော်။ ကွေ့လင်မြို့မှာ ခရီးသွားကောလိပ်လည်း ရှိပါတယ်။ နာမည်ကြီးပါတယ်။ သူက ဘာလုပ်လဲဆိုတော့ ကျွန်မတို့တက္ကသိုလ်နဲ့ အဲဒီကွေ့လင်မှာရှိတဲ့ ခရီးသွားကောလိပ်နဲ့ပေါင်းပြီးတဲ့အခါ အာဆီယံနိုင်ငံတွေမှာရှိတဲ့ခရီးသွားနဲ့ပတ်သက်တဲ့အစိုးရဌာနတွေ၊ ခရီးသွားလုပ်ငန်းရှင်တွေ ဒီလိုမျိုး ပတ်သက်တဲ့လူတွေအကုန်လုံးကိုခေါ်ပြီးတော့ အမြဲတမ်း သင်တန်းပေး ပါတယ်။ ကျွန်မတို့ ကျောင်းထဲမှာ အဲဒီလိုမျိုး training လုပ်ပေးနေတာ (၁၈)ကြိမ်မြောက်ရှိပါပြီ။ အာဆီယံနိုင်ငံအမျိးမျိုးကလူတွေ လာပြီးတော့တက်တယ်။ ဒါကြောင့်မို့ သူတို့ရဲ့ခရီးသွားလုပ်ငန်းဟာ အာဆီယံနိုင်ငံတွေကို မျှဝေပေးနိုင် လောက်အောင် တော်တော်တိုးတက်ပါတယ်။ အဆင်ပြေပါတယ်။ အဆင့်မြင့်ပါတယ်။ အစစအရာရာ ပြည့်စုံပါတယ်။  

မေး - ဒီတော့ ဆရာမရဲ့ မျက်စိထဲမှာ ကွမ်ရှီးပြည်နယ်ရဲ့ ဖွံ့ဖြိုးတိုးတက်မှု ဘာတွေကိုဆရာမ တွေ့မြင် ခံစားခဲ့ရလဲ အဲဒါလေးကိုလဲ ပြန်လည်မျှဝေပေးပါဦးရှင်။

ဖြေ  -  ကျွန်မ စရောက်ကာစ ၂၀၀၈ ခုနှစ်တုန်းကဆိုရင် ဥပမာအားဖြင့် ကျွန်မနေတဲ့နေရာဒေသလေးကိုပဲ ကျွန်မ ပြောပြမယ်နော်။ ကျွန်မနေတဲ့နေရာဟာ ကွမ်ရှီးတိုင်းရင်းသားလူမျိုးစုတက္ကသိုလ် အဲဒီတက္ကသိုလ် လေးဟာ ကျွန်မစရောက်ကာစက ဆင်ခြေဖုံးရပ်ကွက်လေးလိုပဲ ကျွန်မတို့မြန်မာနိုင်ငံမှာရှိတဲ့ တက္ကသိုလ်တွေလို မဟုတ်ဘူး။ ကျွန်မနေတဲ့တက္ကသိုလ်ရှိတဲ့လမ်းဟာ တရွှယ်လုတဲ့ တက္ကသိုလ် လမ်းမကြီးလို့ခေါ်တယ်။ အဲဒီ လမ်းမကြီးက အရှည်ကြီးပါ။ တော်တော်ရှည်ပါတယ်။ အဲဒီရှည်လျားတဲ့ လမ်းမကြီးမှာ ကွမ်ရှီးတက္ကသိုလ်တို့ တက္ကသိုလ်ကောလိပ်တွေမှန်သမျှ အဲဒီနေရာတွေမှာ အားလုံးစုထားတာ။ ကျွန်မရောက်ကာစက ကျွန်မအခုနေတဲ့တက္ကသိုလ်ဟာ ဆင်ခြေဖုံး တကယ့်ဆင်ခြေဖုံးလေး။ သိပ်လည်းမစည်ကားဘူး။ သိပ်လည်း ဖွံ့ဖြိုးတိုးတက်မှုမရှိဘူး။ ကျွန်မတို့ကျောင်းကနေ ဆက်ပြီးသွားလိုက်လို့ရှိရင် ရွာကလေးတွေလိုပဲရှိတယ်။ အဲဒီကနေပြီးတော့ အခု (၁၀)နှစ်အကြာမှာ တစ်ဟုန်ထိုး ကြိုးစားပြီးတဲ့အခါမှာ တည်ဆောက်ပြုပြင်ရေးအများကြီးကို ဆက်တိုက်လုပ်တဲ့အခါ တကယ်မြို့ ကျွန်မတို့အခုနေတဲ့ကျောင်းဟာ အခုမြို့ထဲကို ရောက်သွားပါပြီ။ နန်နင်းမြို့ရဲ့ ဧရိယာထဲကို ရောက်သွားပါပြီ။

 ပြီးတော့ ကျွန်မရောက်ခါစတုန်းက ဘတ်စ်ကားတွေဘာတွေလောက်ပဲ ရှိတာပေါ့နော်။ ဒါပေမယ့် အခု (၁၀)နှစ်အတွင်းမှာ ဘာဖြစ်လာပြီလဲဆိုတော့ မြေအောက်ရထားဖြစ်လာပါပြီ။ မြေအောက်ရထား အခု (၂)လိုင်း ဖွင့်ပါတယ်။ သူတို့ရဲ့ရည်ရွယ်ချက်ကတော့ (၁၀)လိုင်းဖွင့်မယ်လို့ပြောတာပေါ့နော်။ အခု (၂)လိုင်းဖွင့်ပြီးတာ တောင်မှ ဒီနန်နင်းမြို့ထဲမှာ တော်တော်ကိုသွားရလာရ အရမ်းအဆင်ပြေပါတယ်။ အချိန်ကုန်လည်း သက်သာတယ်။ ပြီးတော့ သန့်ရှင်းရေး၊ သာယာရေး၊ လေထုညစ်ညမ်းမှု ထိန်းသိမ်းရေးတွေကို သူတို့က ဦးစား ပေးပြီး တော်တော်ကိုလုပ်ပါတယ်။ သစ်ပင်တွေဘာတွေစိုက်ထားတာ မြက်ပင်တွေဘာတွေစိုက်ထားတာတွေ အပြင် စက်နဲ့လေမှုတ်ပြီးတဲ့အခါ မိုးရွာချသလို မိုးဖွားလေးတွေရွာသလိုလုပ်ပြီး အဲဒီလေထဲမှာရှိတဲ့ဖုန်မှုန့်တွေ ဘာတွေကို ထိန်းထားတဲ့စနစ်တွေက အမြဲတမ်းကားကြီးတွေနဲ့လှည့်ပတ်ပြီး လုပ်နေတာ ဒါကြောင့်မို့ ဒီမှာနေရတာ တကယ်စိတ်ထဲမှာသန့်တယ်လို့ခံစားရတယ် လေထုကပေါ့နော်။

 ကျွန်မအရင်က နန်နင်းကနေ ဘေကျင်းကိုသွားလည်ဖူးတယ် (၂၀၁၀)လောက်ထင်ပါတယ်။ သွားလည်တဲ့အခါ သွားတဲ့အချိန်က နွေဦးရာသီပါ။ နွေဦးရာသီ ဘေဂျင်းကိုရောက်တဲ့အခါ ဘေကျင်းမှာ ပတ်ဝန်းကျင်မှာအမှုန်တွေလွင့်ပျံ့ပြီး လေထုကမသန့်ရှင်းပါဘူး။ အဲတော့ သူတို့က ကျွန်မကို မေးတယ်"ဆရာမ ဘေကျင်းနဲ့နန်နင်းနဲ့ ဘယ်နေရာကိုကြိုက်လဲ၊ ဘယ်ဘက်ကိုသဘောကျလဲ" လို့မေးတယ်။ ကျွန်မကတော့ သူတို့ကိုဖြေခဲ့ပါတယ်။ "ဘေကျင်းကတော့ ရှေးဟောင်းမြို့တော်ကြီးဖြစ်တယ်၊ တိုးတက်တဲ့ မြို့တော်ကြီးဖြစ်တယ်၊ ရှေးဟောင်းနေရာဒေသတွေလည်း သွားလည်ရတာ ကြိုက်ပါတယ်။ ဒါပေမယ့် ကျွန်မ အကြိုက်ဆုံးနေရာကတော့ နန်နင်းပါပဲ။ နန်နင်းကို ဘာကြောင့်ကြိုက်တာလဲဆိုရင် နန်နင်းက သဘာဝသစ်တောနဲ့တူတယ်။ သန့်ရှင်းတဲ့ လေကိုရှုရတယ်။ ပတ်ဝန်းကျင်ကလည်း စိမ်းလန်းစိုပြည်တယ်" ဒါ့ကြောင့်မို့လို့ ကျွန်မက နန်နင်းကို အကြိုက်ဆုံးပါပဲလို့ ဖြေခဲ့ပါတယ်။

မေး - ဟုတ်ကဲ့ပါဆရာမ..နန်နင်းကလည်း ကွမ်ရှီးပြည်နယ်ထဲမှာရှိတယ်။ ဒါ့ကြောင့်ကွမ်ရှီးပြည်နယ်ဟာ ဆိုရင်လည်း သာယာလှပပြီး နေချင်စဖွယ်ပြည်နယ်တစ်ခုဖြစ်တယ်လို့ သတင်းကြီးနေတာပေါ့နော်။ ဒါ့အပြင် ဆရာမရေ..ဆရာမဆီမှာ မြန်မာစာလာသင်တဲ့ တရုတ်ကျာင်းသား၊ ကျောင်းသူကရော အခုဆို ဘယ်နှစ်ယောက်လောက် ရှိနေပြီလဲ။

ဖြေ  - ဒီမှာ ရောက်ကာစက အတန်းတစ်တန်းမှာ လူ (၁၂)ယောက်၊ (၁၃)ယောက်အဲလောက်ပဲပေါ့နော်။ ဒါပမေယ့် အခုနောက်ပိုင်း လေးငါးခြောက်နှစ်အတွင်းမှာ ကျောင်းသူ၊ ကျောင်းသားအရေအတွက်က တစ်တန်း တစ်တန်းဆိုရင် လူနှစ်ဆယ်ကျော် နှစ်ဆယ်ပတ်ဝန်းကျင်ပေါ့နော် အဲဒီလောက်တွေဖြစ်လာတဲ့အခါကျတော့ ဆယ်နှစ်လောက်အတွင်းမှာ တော်တော်များလာတယ်။ ကျောင်းကလဲ မြန်မာနိုင်ငံနဲ့ပတ်သက်တဲ့လုပ်ငန်း တွေမှာ လုပ်ဖို့အတွက် လိုအပ်ချက်အရဆိုတော့ တော်တော်ကို များလာတယ်။ ကျွန်မတို့ကျောင်းက အာဆီယံဘာသာစကားတွေသင်ကြားတာနဲ့ပတ်သက်ပြီးတော့လည်း နာမည်ရှိတယ်လေ။ ဒါကြောင့်မို့ ကျောင်းသူ၊ ကျောင်းသားကတော့ တော်တော်များလာပါတယ်။

မေး - ဟုတ်ကဲ့…တပည့်တွေက အခုဘာအလုပ်တွေလုပ်နေကြလဲဆရာမ။

ဖြေ      - ကျွန်မတပည့်တွေထဲမှာ             ရှိတဲ့လူတွေကတော့    အခုတော်တော်များများကိုပြောရမယ်ဆိုရင် မြန်မာနိုင်ငံ မှာရှိတဲ့ ကုမ္ပဏီတွေမှာ တရုတ်အစိုးရရဲ့ကုမ္ပဏီတွေမှာ လုပ်နေတဲ့သူတွေအများကြီးပါပဲ။ အခု အင်တာဗျူး လုပ်နေတဲ့ နွယ်နွယ် ဟုန်ချွမ်ချွမ်ဆိုရင်လည်း ကျွန်မတို့ကျောင်းကပြီးတဲ့ကျွန်မတို့တပည့်ပါပဲ။

မေး     - ဟုတ်ကဲ့ပါဆရာမ..မမေ့နိုင်စရာကောင်းတဲ့ အမှတ်တရတစ်ခုကိုပြောပါဆိုရင် ဆရာမ ဘယ်လိုအကြောင်းအရာလေးကို ပြောမလဲရှင့်။

ဖြေ      -  အဲဒါကိုပြောမယ်ဆိုရင် ကျွန်မက ဒီကြောင်းကိုလာဖို့အတွက် ကျွန်မကိုခေါ်ခဲ့တဲ့ ဆရာ၊ ဆရာမ နှစ်ယောက်ရှိပါတယ်။ တစ်ယောက်ကတော့ ဆရာကိုအောင်လင်းဆိုတဲ့ဆရာ၊ နောက်ဆရာမတစ်ယောက် ကတော့ ဒေါ်ရီရီဝင်းဆိုတာ ဒီမှာရှိတယ်။ ကျွန်မကို ဒီကိုခေါ်တဲ့ ကျွန်မရဲ့တပည့်ဟောင်းတွေပေါ့နော်။ ဒီတပည့်တွေရဲ့သံယောဇဉ်နဲ့လာခဲ့တာလေ။ ဒီတပည့်တွေရဲ့သံယောဇဉ်နဲ့လာခဲ့ပြီးတဲ့အခါ သူတို့ဘာလုပ်ချင် တာလဲ။ ကွမ်ရှီးကနေပြီးတော့ ဖတ်စာအုပ်လေးလုပ်ချင်တာ..ဒါ့ကြောင့်မို့လို့ ကျွန်မ အခု (၁၀)နှစ်အတွင်းမှာ ဖတ်စာအုပ်လေးပြုစုပြီးပါပြီ။ မြ���ာခင်မှာ ဖတ်စာအုပ်တွေ ထုတ်ပါတော့မယ်။

မေး     - ဟုတ်ကဲ့ပါ ဆရာမရှင်..ကွမ်ရှီးပြည်နယ်မှာရောက်နေတဲ့မြန်မာတစ်ယောက်အနေနဲ့ ကွမ်ရှီးပြည်နယ် ကနေ ကိုယ့်နိုင်ငံအတွက် ဘယ်လိုဗဟုသုတ၊ အတွေးအခေါ် နည်းပညာတွေကိုရရှိပြီးတော့ ကိုယ့်ရဲ့ နိုင်ငံမှာ ဘယ်လို ပြန်လဲအသုံးချသွားမလဲ၊ ဘယ်လိုပြန်လဲအသုံးချနိုင်မလဲဆိုတာကို  သိပါရစေရှင်။

ဖြေ      - ဟုတ်ပါတယ်..ကျွန်မကလည်း ဟိုကနေ လာတဲ့အခါ ဆရာမတစ်ယောက်အနေနဲ့ အနှစ် (၂၀)ကျော်သင်ပြီးတော့မှ ပင်စင်ယူပြီးတော့မှ အလုပ်ကနေ အနားယူပြီးတော့မှ ကျွန်မ ဒီကိုရောက်လာတာလေ။ ရောက်လာတဲ့အခါကျတော့ ဒီကကျောင်းသားတွေက သိပ်ကိုကြိုးစားတာပဲ။ မြန်မာနိုင်ငံမှာရှိတဲ့ ကျောင်းသူ ၊ ကျောင်းသားတွေကိုလည်း ဒီလိုမျိုး ကြိုးစားစေချင်တယ်။ ကျွန်မက ဟိုမှာစာသင်တဲ့အခါလည်း ကလေးတွေကို စာသင်တာ တစ်ခုတည်းမဟုတ်ဘဲ အသိအလိမ္မာ၊ အတတ်ပညာတွေ ၊ အတွေးအခေါ်၊ အယူအဆတွေကို တိုးတက်စေချင်တယ်။ ဒီမှာကျတော့ ကလေးတွေက တော်တော် ကိုယ့်အားကိုယ်ကိုးပြီး လူကြီးတွေဆန်တယ်။ မိဘတွေက ငယ်ငယ်ကတည်းက ကလေးတွေကို ကျောင်းအိပ်ကျောင်းစား ပို့ထားလိုက်တဲ့အခါ သူတို့ဘာသာသူတို့ ကိုယ့်အားကိုယ်ကိုးပြီး လုပ်တာတွေအများကြီးပဲ။ တော်တော်လူကြီးဆန်တယ်။ ဒါပေမယ့် မြန်မာနိုင်ငံက တချို့ ကလေးတွေ လူကြီးမဆန်ဘူးလို့ မရင့်ကျက်ဘူးလို့ ပြောချင်တာမဟုတ်ဘူးနော်။ ဒါပေမယ့် ဒီက ကလေးတွေက တော်တော်ရင့်ကျက်တယ်။ ဒါကြောင့်မို့ ကျွန်မစိတ်ထဲမှာ ကိုယ့်နိုင်ငံမှာ ပြန်ပြီးတော့ ကလေးတွေကို ပညာမျှဝေ ပေးချင်ပေမယ့် ကျွန်မအခုအသက် (၆၀)ပြည့်ပြီလေ ကျွန်မလည်း နောက်နှစ် ဇူလိုင်လဆို အသက် (၆၀)ပြည့်ပြီဆိုတော့ ကျွန်မပင်စင်ယူပြီးတော့ ပြန်မှာပါ။ မြန်မာနိုင်ငံမှာတော့ ကျွန်မအတွက် အလုပ်လုပ်ဖို့ မရှိပေမယ့် ဒီကကလေးတွေ သင်ကြားရတာ သူတို့ရဲ့ပတ်ဝန်းကျင်၊ သူတို့သင်ကြားရတဲ့ Facility အပြည့်အစုံပေါ့နော် စာသင်ကြားရတဲ့အခါ လိုအပ်တာအားလုံးပြည့်စုံတယ်။ အဆောင်တွေနဲ့စာသင်ခန်းတွေနဲ့ အဆင့်မြင့်မြင့်သင်ရတာ ဒါကြောင့်မို့လို့ မြန်မာပြည်မှာလည်း အရမ်းဖြစ်စေချင် ပါတယ်။ ကျွန်မလည်း ကလေးတွေကို ပြန်ပြီးတော့ စာသင်ချင်ပါတယ်။ ဒါပေမယ့် ကျွန်မအသက်အတိုင်းအတာ အရဆိုရင်  ဟိုရောက်ရင် ပင်စင်ယူပြီဆိုတော့ ဆက်ပြီးတော့ သင်ဖြစ်မှာမဟုတ်တော့ပါဘူး။

မေး     - ဟုတ်ကဲ့ပါဆရာမရှင်..ကွမ်ရှီးပြည်နယ်ကြီး နှစ် (၆၀) အတွင်း  တိုးတက်ပြောင်းလဲလာမှုအပေါ် ဆရာမရဲ့ ၀မ်းသာပီတိစကားသံကိုလဲ ကြားသိပါရစေဆရာမရှင်။

ဖြေ      - ကွမ်ရှီးပြည်နယ်ရဲ့ ကိုယ်ပိုင်အုပ်ချုပ်ရေးဒေသဖြစ်တာ နှစ်ပေါင်း (၆၀)ပြည့်တဲ့အချိန်မှာ ကျွန်မ  အသက်နဲ့လဲ မတိမ်းမယိမ်းဖြစ်နေတယ်လေ။ ဒီနှစ် (၆၀)ပြည့်ပြီးရင် ကျွန်မလည်း နောက်နှစ်ဇူလိုင်လဆို အသက် (၆၀)ပြည့်မယ်ဆိုတော့ ကွမ်ရှီးပြည်နယ်ကိုယ်ပိုင်အုပ်ချုပ်ရေးဒေသဟာ ကျွန်မရဲ့အသက်နဲ့ အတူအမျှ ဖြစ်တဲ့အတွက် တကယ်အမှတ်တရအနေနဲ့ ရှိမှာပါ။ ကွမ်ရှီးပြည်နယ်ကိုလဲ ဒီထက်ပိုပြီးတော့ တိုးတက်လာလိမ့် မယ်လို့ ကျွန်မမျှော်လင့်ပါတယ်။ တိုးတက်လာမှာလဲ သေချာပါတယ်။ ဘာဖြစ်လို့လဲဆိုတော့ သူတို့ကတကယ်ကြိုးစားပြီး တကယ်လုပ်ပါတယ်။ အဆင့်ဆင့်ပေါ့နော်။ လူကြီးကနေစပြီး လူငယ်အထိ အကုန်လုံး သေသေချာချာလုပ်ကြကိုင်ကြတာကို ကိုယ့်ရဲ့မျက်စိရှေ့မှာတွေ့နေရတဲ့အတွက်မို့ တကယ်အားကျမိပါတယ်။ ကိုယ့်နိုင်ငံကိုလည်း သူတို့နိုင်ငံတိုးတက်သလို သူတို့ပြည်နယ်ဒေသတိုးတက်သလို တိုးတက်စေချင်တဲ့စိတ်တွေ ခံစားမိပါတယ်။

မေး     - ဟုတ်ကဲ့ပါဆရာမရှင်..ဆရာမအနေနဲ့ တခြားဖြည့်စွက်ပြောကြားချင်တာများရှိရင်လဲ ပြောကြား ပေးပါဦးရှင်။

ဖြေ      -  ကွမ်ရှီးပြည်နယ်က ဒီ့ထက်ဒီ့ထက် ပိုတိုးတက်ဖို့ပဲရှိပါတယ်။ တခြားပြည်နယ်တွေ ကျွန်မ ဟူနန်တို့ယူနန်တို့ ပြီးတော့ ဟိုဘက်က ဟန်ကျိုးတို့ဘေကျင်းတို့တော်တော်များများ ရောက်ဖူးပါတယ်။ ရောက်ဖူးပေမယ့် ဒီကွမ်ရှီးလောက် သဘာဝပတ်ဝန်းကျင်ကို ထိန်းသိမ်းနိုင်တာ သန့်ရှင်းမှုကို ထန်းသိမ်းနိုင်တာ၊ လေထုညစ်ညမ်းမှု သဘာဝပတ်ဝန်းကျင်ကို ထိန်းသိမ်းနိုင်တာ တကယ်တော်တယ်။ ကျွန်မ အားကျမိတယ်။ သဘောကျမိတယ်။ ဒါကြောင့်မို့လို့ ကွမ်ရှီးပြည်နယ်ဟာ အရှိန်အဟုန်နဲ့တိုးတက်ဖို့ ကြိုးစားနေတယ်။ ကြိုးစားနေသလိုပဲ တစ်ဖက်မှာလဲ သူက သဘာဝပတ်ဝန်းကျင်ထိန်းသိမ်းရေး သဘာဝမညစ်ညမ်းအောင် လုပ်နေတာတွေကို မျက်စိရှေ့မှာတွေ့နေရတဲ့အတွက် ကွမ်ရှီးပြည်နယ်ဟာ ဒီထက် ပိုတိုးတက်မှာပါလို့ ကျွန်မယုံကြည်တဲ့ အကြောင်း ပြောချင်ပါတယ်။

မေး     - ဟုတ်ကဲ့ပါဆရာမရှင်… ကွမ်ရှီးပြည်နယ်ကြီး နှစ် (၆၀)ပြည့်အထိမ်းအမှတ် အခမ်းအနားအကြောင်းကို ဆရာမအနေနဲ့ အခုလိုမျိုးဖြေကြားပေးတဲ့အတွက်ကြောင့် အထူးပဲ ကျေးဇူးတင်ရှိပါတယ်ရှင်။

ဖြေ      -  ဟုတ်ကဲ့ပါ..ကျွန်မလဲ ကျေးဇူးတင်ပါတယ်ရှင်။

                                                 မေးမြန်းသူ- စုသက်မှူး (su thet)  
   Webradio