နိုဝင်ဘာလ ၂၆ ရက်နေ့က တရုတ်နိုင်ငံခြားရေး ဝန်ကြီးဌာန ပြောရေးဆိုခွင့်ရှိသူက မူးယစ်ဆေးဝါးဆိုင်ရာ အမေရိကန်ဘက်၏ ပြောဆိုချက်နှင့် ပတ်သက်ပြီး သတင်းထောက်၏ မေးမြန်းချက်များကို ဖြေကြားခဲ့သည်။
အမေရိကန် သမ္မတ အဖြစ် အရွေးခံရသည့် ထရမ့်က အမေရိကန်သည် Fentanyl အပါအဝင် မူးယစ်ဆေးဝါးပြဿနာနှင့် ပတ်သက်ပြီး တရုတ်ပြည်ဘက်နှင့် စေ့စပ် ဆွေးနွေး သော်လည်း တိုးတက်မှု လုံးဝ မရှိကြောင်း၊ မူးယစ်ဆေးဝါး အမြောက်အမြား အမေရိကန်သို့ ဝင်ရောက်သဖြင့် အမေရိကန်သည် တရုတ်နိုင်ငံမှ တင်သွင်းလာသော ကုန်ပစ္စည်း အားလုံး အပေါ် အခွန် ၁၀ ရာခိုင်နှုန်း တိုးကောက်မည် ဖြစ်ကြောင်း ဆိုရှယ် မီဒီယာမှာ ပြောခဲ့သည်။ ယင်းနှင့် ပတ်သက်ပြီး တရုတ်နိုင်ငံက မည်သည့် ဝေဖန်ချက်တွေ ရှိသနည်းဟု သတင်း ထောက်က မေးမြန်းခဲ့ရာ
ပြောရေးဆိုခွင့်ရှိသူက Fentanyl ပြဿနာသည် အမေရိကန်၏ ပြဿနာ ဖြစ်ကြောင်း၊ လူသားချင်း စာနာထောက်ထားမှု စိတ်ဓာတ်ဖြင့် အမေရိကန်က Fentanyl ပြဿနာကို ရင်ဆိုင်ဖြေရှင်းရာတွင် တရုတ်နိုင်ငံက ထောက်ပံ့မှု ပေးခဲ့ကြောင်း၊ အားလုံးသိကြသည့် အတိုင်းပဲ တရုတ်နိုင်ငံသည် အမေရိကန်နှင့် မူးယစ်ဆေးဝါးတိုက်ဖျက်ရေး ပူးပေါင်း ဆောင် ရွက်မှုကို ကျယ်ပြန့် နက်ရှိုင်းစွာ ပြုလုပ်ပြီး ထင်ရှားသော အကျိုး သက်ရောက်မှု များကို ရရှိခဲ့ကြောင်း၊ အမေရိကန် အနေနှင့် တရုတ်နိုင်ငံ၏ စေတနာကောင်းကို အသိအမှတ်ပြု သင့်ပြီး နှစ်ဖက်အကြား ပူးပေါင်းဆောင်ရွက်မှုဖြင့် ရရှိလာသော အခြေအနေကောင်းကို ထိန်းသိမ်းကာကွယ်သင့်ကြောင်း ဖြေကြားခဲ့ပါသည်။
