ယူကရိန်းမှ ရုရှားအား တာဝေးပစ်ဒုံးကျည်များဖြင့် တိုက်ခိုက်မှုကို ထောက်ခံခြင်းကြောင့် နစ်နာဆုံးရှုံးမှု ခံရမည်ဟု ရုရှားက ပြင်သစ်နှင့် ဗြိတိန်အား သတိပေး

ဗီယင်နာရှိ နိုင်ငံတကာ အဖွဲ့အစည်းများဆိုင်ရာ ရုရှား အမြဲတမ်း ကိုယ်စားလှယ်  Mikhail Ivanovich Ulyanov က ပြင်သစ်နှင့် ဗြိတိန်တို့သည် ယူကရိန်းမှ တာဝေးပစ်ဒုံးကျည်များဖြင့် ရုရှားနိုင်ငံရှိ ပစ်မှတ်များ တိုက်ခိုက်မှုကို ထောက်ခံခြင်းကြောင့် နစ်နာဆုံးရှုံးမှု ခံရမည်ဖြစ်ကြောင်း ပြောကြားခဲ့သည်ဟု ရုရှား TASS သတင်းဌာနမှ ဒေသစံတော်ချိန် ယခုလ ၂၄ ရက်နေ့တွင် ပြောကြားခဲ့သည်။

ပြင်သစ်နှင့် ဗြိတိန်တို့သည် ယူကရိန်းအား SCALP နှင့် Storm Shadow ခရုဇ်ဒုံးကျည်များဖြင့် ရုရှားပိုင်နက်ကို တိုက်ခိုက်ရန် ခွင့်ပြုချက် ပေးနေပြီဖြစ်ကြောင်း၊ SCALP နှင့် Storm Shadow တို့သည် ပြင်သစ်နှင့် ဗြိတိန်တို့ ပူးပေါင်း တီထွင်ဖန်တီးပြီး MBDA မှ ထုတ်လုပ်သည့် တူညီသော ဒုံးကျည်မျိုး ဖြစ်ကြောင်း၊ ယင်းခရုဇ်ဒုံးကျည်ကို စစ်သင်္ဘော သို့မဟုတ် တိုက်လေယာဉ်မှ ပစ်လွှတ်နိုင်ပြီး ကီလိုမီတာ ၂၅၀ မှ ၅၀၀ အထိ အကွာအဝေးသို့ ပစ်ခတ်နိုင်ကြောင်း လွန်ခဲ့သည့် ရက်သတ္တပတ်က မီဒီယာအချို့မှ သတင်းအရ သိရပါသည်။