ယူကရိန်းအား တိုက်ခိုက်ခဲ့သည့် တာလတ်ပစ် အသံထက်မြန်သော ဒုံးကျည်သစ် စမ်းသပ်မှုကို ပူတင် အတည်ပြု

ဒေသစံတော်ချိန် နိုဝင်ဘာလ ၂၁ ရက်နေ့က ရုရှားတပ်ဖွဲ့သည် ယူကရိန်းစစ်ရေးစက်မှုလုပ်ငန်း ကုမ္ပဏီများအား တိုက်ခိုက်ခဲ့ကြောင်း၊ ယခုအကြိမ်တိုက်ခိုက်မှုတွင် ရုရှားတပ်ဖွဲ့များက 'Hazel' ဟု အမည် ပေးထားသော နျူကလီးယား ထိပ်ဖူးမတပ်ထားသည့် တာလတ်ပစ် အသံထက်မြန်သော ဒုံးကျည် အသစ် များကို စမ်းသပ်အသုံးပြုခဲ့ကြောင်း၊ ယခုအချိန်တွင် အဆိုပါ ဒုံးကျည်အမျိုးအစားကို ကြားဖြတ် ဟန့်တားနိုင်သော ဒုံးဖျက်စနစ်မရှိကြောင်း ယခုလ ၂၁ ရက်နေ့ညတွင် ရုရှားသမ္မတ ပူတင်က ရုပ်မြင် သံကြားဌာနမှတစ်ဆင့် မိန့်ခွန်းပြောကြားခဲ့သည်။

မည်သည့်ပုံစံဖြင့်မဆို ပဋိပက္ခ အဆင့်မြင့်တက်လာပါက ရုရှားနိုင်ငံသည် နိုင်ငံတော်၏ လုံခြုံရေးနှင့် အချုပ်အခြာအာဏာကို ကာကွယ်ရန်အတွက် ပြတ်ပြတ်သားသား တုံ့ပြန်ဆောင်ရွက်မည်ဖြစ်ကြောင်း ပူတင်က ပြောကြားခဲ့သည်။