ဒေသစံတော်ချိန် နိုဝင်ဘာလ ၁၉ ရက်နေ့ နံနက်ပိုင်းက တရုတ်နိုင်ငံသမ္မတ ရှီကျင့်ဖိန် သည် ရီယိုဒီဂျနေးရိုမြို့တွင် G20 ထိပ်သီးခေါင်းဆောင်များအစည်းအဝေးသို့ တက်ရောက် စဉ်အတောအတွင်း ပြင်သစ်နိုင်ငံသမ္မတ မက်ခရွန် နှင့် တွေ့ဆုံနှုတ်ဆက်ခဲ့ပါသည်။
ထိုသို့တွေ့ဆုံရာတွင် သမ္မတ ရှီကျင့်ဖိန် က တရုတ်-ပြင်သစ်နှစ်နိုင်ငံတို့သည် လွတ်လပ်ပြီး ရင့်ကျက်ကာ တာဝန်ယူတတ်သော နိုင်ငံကြီးများ ဖြစ်ကြကြောင်း၊ နှစ်နိုင်ငံ ဆက်ဆံရေးမှာ တမူထူးခြားသော မဟာဗျူဟာမြောက်တန်ဖိုးနှင့် ကမ္ဘာလုံးဆိုင်ရာ အဓိပ္ပါယ်ရှိကြောင်း၊ နှစ်ဦးနှစ်ဖက်တို့သည် မဟာဗျူဟာမြောက်ဆက်သွယ်မှုကို ပိုမို နက်ရှိုင်းလာစေပြီး အပြန်အလှန်ထောက်ခံမှုများကို မြှင့်တင်ကာ တရုတ်-ပြင်သစ် ဆက်ဆံရေး ခြေလှမ်းမှန်မှန်ဖြင့် အပြုသဘောဆောင်သည့် ဖွံ့ဖြိုးတိုးတက်ရေးအရှိန်အဟုန် ကို ထိန်းသိမ်းထား၍ တရုတ်-ဥရောပဆက်ဆံရေး ကောင်းမွန်စွာ ဖွံ့ဖြိုးတိုးတက်ရန်၊ ကမ္ဘာ့ငြိမ်းချမ်းတည်ငြိမ်ရန်အတွက် ပိုမိုကြီးမားသော အကျိုးပြုစွမ်းဆောင်မှုများ ပြုလုပ်ရ ကြောင်း ပြောကြားခဲ့ပါသည်။
သမ္မတ ရှီကျင့်ဖိန် က အကြိမ် ၂၀ မြောက် တရုတ်ကွန်မြူနစ်ပါတီ ဗဟိုကော်မတီ တတိယအကြိမ် မျက်နှာစုံညီအစည်းအဝေးတွင် အသစ်တစ်ကြိမ် တရုတ်နိုင်ငံ၏ ပြုပြင် ပြောင်းလဲရေးနှင့် တံခါးဖွင့်ရေးဖြစ်စဉ်ကို စတင်လိုက်ကြောင်း၊ ၄င်းမှာ တရုတ်-ပြင်သစ် ပူးပေါင်းဆောင်ရွက်ရေးအတွက် အခွင့်အလမ်းသစ်ကို ထောက်ပံ့ပေးမည် ဖြစ်ပြီး နှစ်ဦးနှစ်ဖက်အကြား လက်တွေ့ကျပူးပေါင်းဆောင်ရွက်ရေး ရှေ့အလားအလာ ကောင်းမွန် ကြောင်း၊ နှစ်ဦးနှစ်ဖက်တို့မှ အဆင့်မြင့်စီးပွားရေး၊ ဘဏ္ဍာရေးနှင့် ငွေရေးကြေးရေး ဆွေးနွေးပွဲနှင့် စီးပွားကုန်သွယ်ရေး Joint ကော်မတီ စသည့်စနစ်များကို ကောင်းမွန်စွာ အသုံးပြုပြီး ပူးပေါင်းဆောင်ရွက်ရေးအလားအလာကို နက်ရှိုင်းစွာ ဖော်ထုတ်ကာ အားသာချက်များ အပြန်အလှန်ဖြည့်စွက်မှုကို မြှင့်တင်ပြီး သဘောကွဲလွဲမှုများကို ကောင်းမွန်စွာ ကိုင်တွယ်ဖြေရှင်း၍ အပြန်အလှန်အကျိုးရှိစေရေးကို အကောင်အထည် ဖော်ရန် မျှော်လင့်ကြောင်း အလေးထားပြောကြားခဲ့ပါသည်။
သမ္မတ မက်ခရွန် က ပြင်သစ်နိုင်ငံအနေဖြင့် တရုတ်နိုင်ငံနှင့်အတူ နှစ်နိုင်ငံထိပ်သီး ခေါင်းဆောင်များမှ ရရှိခဲ့သည့် သဘောတူညီမှုများကို သေချာစွာ အကောင်အထည်ဖော်ပြီး အဆင့်မြင့်ကူးလူးဖလှယ်မှုများကို ဆက်လက်ရင်းနှီးလာကာ လူမှုယဉ်ကျေးမှုကူးလူး ဖလှယ်ရေးကို မြှင့်တင်ပြီး ချစ်ကြည်ရေးအစဉ်အလာကို လက်ဆင့်ကမ်း၍ နိုင်ငံများအကြား ဆက်ဆံရေးသစ်ကို ထူထောင်ရန် ဆန္ဒရှိကြောင်း၊ ပြင်သစ်နိုင်ငံအနေဖြင့် မဟာဗျူဟာ လွတ်လပ်မှုကို စွဲကိုင်ထားပြီး တစ်ဦးကို တစ်ဦးက လေးစားခြင်းစိတ်ဓာတ်ဖြင့် တရုတ် နိုင်ငံနှင့် ဆွေးနွေးမှုနှင့် ပူးပေါင်းဆောင်ရွက်မှု ပြုလုပ်ကာ စီးပွားကုန်သွယ်ရေး အငြင်းပွားမှုများကို ကောင်းမွန်စွာ ကိုင်တွယ်ဖြေရှင်းရန်၊ နှစ်ဦးနှစ်ဖက်တို့မှ စီးပွား ကုန်သွယ်ရေးဆက်ဆံရေး ပုံမှန် တည်ငြိမ်စွာ ဖွံ့ဖြိုးတိုးတက်စေပြီး ရာသီဥတုပြောင်းလဲမှု ရင်ဆိုင်ရေးနှင့် AI ဆိုင်ရာ တစ်ကမ္ဘာလုံးစီမံခန့်ခွဲမှုစသည့်နယ်ပယ်များတွင် ပူးပေါင်းဆောင်ရွက်မှုများကို မြှင့်တင်ရန် ဆန္ဒရှိကြောင်း ပြောကြားခဲ့ပါသည်။
နှစ်ဦးနှစ်ဖက်တို့သည် ယူကရိန်းအကျပ်အတည်းနှင့်ပတ်သက်ပြီးလည်း အမြင်ချင်း ဖလှယ်ခဲ့ကြပါသည်။
