ဒေသစံတော်ချိန် နိုဝင်ဘာလ ၁၇ ရက်နေ့က တရုတ်နိုင်ငံတော်သမ္မတ ရှီကျင့်ဖိန်သည် ဂျီ-၂၀ အုပ်စုခေါင်းဆောင်များ ၁၉ ကြိမ်မြောက် ထိပ်သီးအစည်းအဝေးကို တက်ရောက်ရန်နှင့် ဘရာဇီးနိုင်ငံတွင် တရားဝင်ခရီးလှည့်လည်ရန် ရီယိုဒီဂျနေရိုးသို့ သွားရောက်သည့် အခါသမယ၌ ၊ ဘရာဇီးနိုင်ငံ Folha de São Paulo သတင်းစာတွင် ကောင်းမွန်သော ဆက်ဆံရေးနှင့် ဘုံကံကြမ္မာအတွက် လက်တွဲပြီး ရွက်လွှင့်ရန် အချိန်တန်ပြီဖြစ်သည် ဟူသော ရှီကျင့်ဖိန်၏ ဆောင်းပါးကို ထုတ်ပြန်ခဲ့သည်။
ရှီကျင့်ဖိန်၏ ဆောင်းပါးတွင် ၁၉၇၄ခုနှစ် ဩဂုတ်လ ၁၅ရက်နေ့က တရုတ်နှင့် ဘရာဇီးတို့သည် သံတမန် ဆက်ဆံမှုကို ထားရှိခဲ့ကြောင်း၊ လွန်ခဲ့သည့် နှစ်ပေါင်း ၅၀အတွင်း နှစ်နိုင်ငံ ဆက်ဆံမှုသည် နိုင်ငံတကာ အခြေအနေ ပြောင်းလဲမှုကြောင့် ဖြစ်ပေါ်လာသော စိန်ခေါ်မှုများကို ကြုံတွေ့ခဲ့ရပြီး တစ်နေ့တခြား ရင့်ကျက်ရှင်သန်လာကာ နှစ်နိုင်ငံတို့၏ ဖွံ့ဖြိုးတိုးတက်မှုကို အားကောင်းလာ၍ ကမ္ဘာ့ ငြိမ်းချမ်းရေးနှင့် တည်ငြိမ်ရေး အတွက် အပြုသဘောဆောင်သော အကျိုးပြုမှုကိုလည်း စွမ်းဆောင်ခဲ့ပြီး၊ ဖွံ့ဖြိုးဆဲ နိုင်ငံကြီး ၂နိုင်ငံ အကြား ပူးပေါင်း ဆောင်ရွက်ကာ၊ အပြန်အလှန် အကျိုးရရှိစေသည့်၊ အေးအတူပူအမျှ ဖြစ်သည့် စံနမူနာများကို စိုက်ထူနိုင်ခဲ့ကြောင်း ရေးသားဖော်ပြထားသည်။
၄င်းဆောင်းပါးတွင် တရုတ်နှင့် ဘရာဇီး နှစ်နိုင်ငံတို့သည် အပြန်အလှန် လေးစားခြင်း၊ တန်းတူညီမျှစွာ ပေါင်းသင်းဆက်ဆံရေးနှင့် နိုင်ငံ တစ်နိုင်ငံမှ ပြည်သူများ ရွေးချယ်သည့် ဖွံ့ဖြိုး တိုးတက်ရေး လမ်းကြောင်း အပေါ် တစ်နိုင်ငံက နားလည်ထောက်ခံခြင်းမူများကို အမြဲတမ်း စွဲကိုင်ခဲ့ကြောင်း၊ နှစ်နိုင်ငံတို့သည် အပြန်အလှန် အကျိုးရှိစေပြီး win-winရရှိခြင်း၊ အားသာချက် ဆိုင်ရာ အပြန်အလှန် ဖြည့်ဆည်းခြင်းနှင့် နှစ်နိုင်ငံ၏ ခေတ်မီတိုးတက်ရေး ဖြစ်စဉ်ကို လက်တွဲ တွန်းအားပေးခြင်းမူများကို အမြဲတမ်း စွဲကိုင်ကြောင်း၊ နှစ်နိုင်ငံတို့သည် တံခါးဖွင့်မှုနှင့် ဘက်ပေါင်းစုံ ပါဝင်နိုင်မှု၊ အပြန်အလှန် နည်းယူလေ့လာခြင်းကို အမြဲတမ်း စွဲကိုင်ပြီး ချစ်ခင်ရင်းနှီးမှုနှင့် သာယာကောင်းမွန်သော ကိစ္စများ အပေါ် ဘုံလိုက်စားမှု ရှိကြကြောင်း၊ နှစ်နိုင်ငံတို့သည် ငြိမ်းချမ်းစွာ ဖွံ့ဖြိုးတိုးတက်မှုနှင့် တရားမျှတမှုကို အမြဲတမ်း စွဲကိုင်ပြီး နိုင်ငံတကာနှင့် ဒေသဆိုင်ရာ ပြဿနာများ အပေါ် တူညီသော၊ သို့မဟုတ်၊ နီးစပ်သော အမြင် သဘောထား ရှိကြကြောင်း ရေးသားဖော်ပြထား သည်။
ရှီကျင့်ဖိန်၏ ဆောင်းပါး၌ လက်ရှိတွင် ကမ္ဘာသည် နှစ်ပေါင်းတစ်ရာ၌ မကြုံစဖူး ကြီးမားသော ပြောင်းလဲမှုများ အရှိန်မြှင့် ပြောင်းလဲတိုးတက်နေပြီး စိန်ခေါ်မှုသစ်နှင့် ပြောင်းလဲမှုသစ်များ အဆက်မပြတ် ထွက်ပေါ်လာကြောင်း၊ အရှေ့ဘက်ခြမ်းနှင့် အနောက်ဘက်ခြမ်းတွင် ဖွံ့ဖြိုးဆဲ နိုင်ငံကြီး နှစ်နိုင်ငံနှင့် အရေးကြီး BRICSအဖွဲ့ဝင် နိုင်ငံ နှစ်နိုင်ငံ ဖြစ်ကြသည့် အနေဖြင့် တရုတ်နှင့် ဘရာဇီးတို့သည် ပိုမို ရင်းနှီးပြီး စည်းလုံး ညီညွတ်ကာ လမ်းကြောင်းသစ်ကို လက်တွဲ ဖွင့်လှစ်၍ နှစ်နိုင်ငံ ပြည်သူများ အပါအဝင် လူသားတို့၏ ပိုမိုကောင်းမွန်သာယာသည့် အနာဂတ်သို့ လက်တွဲ ချီတက်ကြမည် ဖြစ်ကြောင်း၊ မိမိတို့သည် တရုတ်-ဘရာဇီး ချစ်ကြည်ရေး ဦးတည်ချက်ကို စွဲကိုင်ပြီး တရုတ်-ဘရာဇီး အပြန်အလှန် အကျိုးရှိစေသည့် ပူးပေါင်းဆောင်ရွက်မှု အတွက် တွန်းအားသစ်များကို ပျိုးထောင်မည် ဖြစ်ကြောင်း၊ မိမိတို့သည် တရုတ်-ဘရာဇီး ပြည်သူများ၏ ချစ်ကြည်ရေး အခြေခံအုတ်မြစ်ကို ပိုမိုခိုင်မာစေရန် ဆောင်ရွက်မည် ဖြစ်ကြောင်း၊ မိမိတို့သည် တရုတ်-ဘရာဇီး စည်းလုံးညီညွတ်ရေးနှင့် အပြန်အလှန် ကူညီပံ့ပိုးရေး ဖြစ်သည့် နိုင်ငံကြီးများ၏ တာဝန်ယူတတ်ခြင်းကို ပြသမည် ဖြစ်ကြောင်း ရေးသားဖော်ပြထားသည်။
ထို့အပြင်၊ ၄င်းဆောင်းပါးတွင် မိမိ၏ ယခုအကြိမ် ဘရာဇီး ခရီးစဉ်၏ အရေးကြီး ရည်ရွယ်ချက် နောက်တစ်ခု ကတော့ G20ထိပ်သီးခေါင်းဆောင်များ အစည်းအဝေးသို့ တက်ရောက်ရန်ပင် ဖြစ်ကြောင်း၊ G20သည် နိုင်ငံတကာ စီးပွားရေး ပူးပေါင်းဆောင်ရွက်မှု အတွက် အရေးကြီး ပလက်ဖောင်း ဖြစ်ကြောင်း၊ တရားမျှတသော ကမ္ဘာ တစ်ခုကို တည်ဆောက်ရန် အတွက် G20 အနေနှင့် အပြန်အလှန် လေးစားခြင်း၊ တန်းတူညီမျှစွာ ပူးပေါင်းဆောင်ရွက်ရေး၊ အပြန်အလှန် အကျိုးရှိစေပြီး win-winရရှိရေး မူများကို စွဲကိုင်ကာ “ကမ္ဘာတောင်ဘက်ခြမ်း” နိုင်ငံများ ပိုမို ကြီးမားသည့် ဖွံ့ဖြိုးတိုးတက်မှု ရရှိနိုင်အောင် အားပေးထောက်ခံရန် လိုအပ်ကြောင်း၊ ဖွံ့ဖြိုးတိုးတက်ရေးကို G20 ပူးပေါင်း ဆောင်ရွက် ရေး၏ အမြုတေ အဆင့်နေရာတွင် ထားရှိရမည် ဖြစ်ကြောင်း၊ ကုလသမဂ္ဂ ၂၀၃၀ပြည့်နှစ် စဉ်ဆက်မပြတ် ဖွံ့ဖြိုးတိုးတက်ရေး အစီအစဉ် အကောင်အထည် ဖော်ဆောင်ရေးကို ဦးစားပေး လုပ်ငန်း အဖြစ် လုပ်ဆောင်ရမည် ဖြစ်ကြောင်း၊ စဉ်ဆက်မပြတ် ဖွံ့ဖြိုး တိုးတက် နိုင်သော ကမ္ဘာကို တည်ဆောက်ရန် အတွက် G20 အနေနှင့် စဉ်ဆက်မပြတ် ဖြစ်သည့် ထုတ်လုပ်မှု ပုံစံနှင့် နေထိုင်မှု ပုံစံကို အားပေးတိုက်တွန်းပြီး လူနှင့်သဘာဝတို့ကြား သင့်မြတ်စွာ အတူနေထိုင်ရေးကို အကောင်အထည် ဖော်ဆောင်ရန် လိုအပ်ကြောင်း ရေးသား ဖော်ပြထားသည်။
ရှီကျင့်ဖိန်၏ ဆောင်းပါး နိဂုံးတွင် G20 ခေါင်းဆောင်များ Rio de Janeiro ထိပ်သီး အစည်းအဝေးသည် အောင်ကျိုးရလဒ် များစွာ ရရှိနိုင်မည်မှာ မုချမလွဲ ဖြစ်ကြောင်း၊ မိမိသည် သမ္မတ Lula နှင့် အတူ တရုတ်-ဘရာဇီး ဆက်ဆံမှုကို “နှစ်၅၀တာ ရွှေကာလ”အသစ်သို့ ဝင်ရောက်ရန် ဦးဆောင်ပြီး ပိုမို တရားမျှတသော၊ ပိုမို စဉ်ဆက်မပြတ် ဖြစ်သည့် ကံကြမ္မာတူ အသိုက်အဝန်းကို တည်ဆောက်ဖို့ လက်တွဲ ကြိုးပမ်းဆောင်ရွက်ရန် မျှော်လင့်ကြောင်းလည်း ရေးသားဖော်ပြထားသည်။
