“ပီရူးနိုင်ငံသည် ပစိဖိတ်သမုဒ္ဒရာတစ်ဖက်ကမ်းရှိ တရုတ်နိုင်ငံ၏ အိမ်နီးချင်းဖြစ်သည်။” တစ်နေ့ထက်တစ်နေ့များပြားလာသည့် စီးပွားရေးနှင့် ကုန်သွယ်ရေးဆိုင်ရာ ပူးပေါင်းဆောင်ရွက်မှုများ နှင့် လူမှုယဉ်ကျေးမှု ကူးလူးဖလှယ်မှုများသည် သမုဒ္ဒရာခြားနေသော အိမ်နီးချင်း တရုတ်နှင့်ပီရူး၏ အကွာအဝေးကို ဆက်တိုက်နီးကပ်လာစေသည်။ တရုတ်နိုင်ငံသမ္မတ ရှီကျင့်ဖျင် ပီရူးနိုင်ငံသို့ နိုင်ငံတော်ခရီးစဉ်သွားရောက်နေစဉ်အတွင်း China Media Group (CMG) CGTN သည် ခေတ်သစ်နိုင်ငံတကာဆက်သွယ်ရေးသုတေသနဌာန မှတစ်ဆင့် ပီရူးနိုင်ငံမှ အဆင့်မြင့်သုတေသနစင်တာနှင့် ပထမဆုံးအကြိမ်ပူးပေါင်း၍ ပီရူးနိုင်ငံမှ စစ်တမ်းဖြေကြားသူ ၁၁၁၁ ဦးအား “၂၀၂၄ ခုနှစ် တရုတ်နိုင်ငံအပေါ် ပီရူးနိုင်ငံ၏ အကောင်းမြင်မှု” စစ်တမ်းကောက်ယူခဲ့သည်။ စစ်တမ်းတွင် ဖြေကြားသူများက တရုတ်-ပီရူး အစဉ်အလာချစ်ကြည်ရေးနှင့် လက်တွေ့ပူးပေါင်းဆောင်ရွက်မှုရလဒ်များကို တက်တက်ကြွကြွ အသိအမှတ်ပြုကြပြီး တရုတ်-လက်တင်အမေရိကဆက်ဆံရေးနှင့် “ကမ္ဘာ့တောင်ဘက်ခြမ်း” နိုင်ငံများ အရည်အသွေးမြင့်ပူးပေါင်းဆောင်ရွက်မှုဆိုင်ရာ “ပီရူးစံနမူနာ”တည်ဆောက်ရန် မျှော်လင့်နေကြသည်။
ပီရူးနိုင်ငံသည် တရုတ်ပြည်သူ့သမ္မတနိုင်ငံနှင့် အစောဆုံး သံတမန်ဆက်ဆံရေး ထူထောင်ထားသည့်၊ တရုတ်နိုင်ငံနှင့် အစောဆုံး ဘက်စုံမဟာဗျူဟာမြောက် မိတ်ဖက်ဆက်ဆံရေး ထူထောင်ထားသည့် လက်တင်အမေရိကနိုင်ငံတစ်နိုင်ငံဖြစ်ပြီး နှစ်ဦးနှစ်ဖက်သည် ရိုးသား၍ အပြန်အလှန်ယုံကြည်မှုရှိသော မိတ်ဆွေကောင်းနှင့် အတူတကွဖွံ့ဖြိုးတိုးတက်ကြသည့် မိတ်ဖက်ကောင်းများ ဖြစ်ကြသည်။ စစ်တမ်းတွင် ဖြေကြားသူ ၈၉.၆% က တရုတ်နိုင်ငံကို အကောင်းမြင်ကြသည်။ ဖြေကြားသူ ၉၇.၇% က တရုတ်နိုင်ငံသည် အရေးပါသောနိုင်ငံဖြစ်သည်ဟု ယူဆကြသည်။ ဖြေကြားသူ ၉၇.၂% က တရုတ်နိုင်ငံသည် အောင်မြင်သောနိုင်ငံဖြစ်သည်ဟု ယူဆကြသည်။ ဖြေကြားသူ ၉၁.၅% က တရုတ်နိုင်ငံသည် ဆွဲဆောင်မှုရှိသောနိုင်ငံဖြစ်သည်ဟု ယူဆကြသည်။ ဖြေကြားသူ ၉၁.၂% က တရုတ်နိုင်ငံသည် လေးစားထိုက်သောနိုင်ငံဖြစ်သည်ဟု ယူဆကြသည်။ ထို့ပြင် ပီရူးမှ စစ်တမ်းဖြေကြားသူများက တရုတ်နိုင်ငံကိုလာရောက်လိုသောဆန္ဒများကို ဖော်ပြခဲ့ကြသည်။ ဖြေကြားသူ ၉၄% က တရုတ်နိုင်ငံသို့ ခရီးထွက်ရန်၊ လာရောက်လေ့လာရန်၊ ပညာတော်သင်ရန် မျှော်လင့်နေကြပြီး အသက် ၁၈ နှစ်မှ ၂၄ နှစ်အတွင်း လူငယ်ဖြေကြားသူများအနက် ယင်းအချိုးအစားသည် ၉၅.၉% ကျော်အထိ မြင့်မားနေသည်။
ကမ္ဘာ့အကြီးဆုံး ဖွံ့ဖြိုးဆဲနိုင်ငံအနေဖြင့် တရုတ်အသွင်ပုံစံ ခေတ်မီမှု၏ ဖွံ့ဖြိုးတိုးတက်ရေးရလဒ်ကောင်းများနှင့် အတွေးအခေါ်များသည် “ကမ္ဘာ့တောင်ဘက်ခြမ်း” နိုင်ငံများအတွက် အဖိုးတန်အတွေ့အကြုံများနှင့် ကျယ်ပြန့်သောအခွင့်အလမ်းများ ပံ့ပိုးပေးနေသည်။ ပီရူးမှ ဖြေကြားသူများက တရုတ်နိုင်ငံ၏ အရည်အသွေးမြင့် ဖွံ့ဖြိုးတိုးတက်မှုနှင့် အရည်အသွေးမြင့် ပြင်ပသို့တံခါးဖွင့်လှစ်မှု ရလဒ်ကောင်းများကို များစွာ အသိအမှတ်ပြုကြကြောင်း စစ်တမ်းတွင်တွေ့ရှိရသည်။ ၎င်းအနက် ဖြေကြားသူ ၉၇.၂% က တရုတ်နိုင်ငံ၏စီးပွားရေး မြန်နှုန်းမြင့်တိုးတက်လာမှုကို ချီးကျူးကြပြီး ဖြေကြားသူ ၉၄.၈% က တရုတ်နိုင်ငံ၏စီးပွားရေး ရေရှည်ကောင်းမွန်နေမည်ဟု ယူဆကြသည်။ ဖြေကြားသူ ၈၉.၉% က တရုတ်နိုင်ငံသည် ကမ္ဘာလုံးဆိုင်ရာ စက်မှုကွင်းဆက်နှင့် ထောက်ပံ့ရေးကွင်းဆက် တည်ငြိမ်မှုအတွက် အရေးပါသည်ဟု ဆိုကြသည်။ ဖြေကြားသူ ၈၅.၇% က တရုတ်နိုင်ငံသည် လွတ်လပ်ပွင့်လင်း၍ တန်းတူညီမျှယှဉ်ပြိုင်သော ကြီးမားသည့်စျေးကွက်ကြီးတစ်ခု ဖြစ်သည်ဟု ယူဆကြသည်။ ဖြေကြားသူ ၉၆.၆% က ကမ္ဘာ့စီးပွားရေး ပြန်လည်ဦးမော့လာစေရေးအတွက် တရုတ်နိုင်ငံ၏ သိသာထင်ရှားစွာ အကျိုးပြုမှုများကို ချီးကျူးခဲ့ကြသည်။
