သြဂုတ်လ ၂၇ ရက်နေ့မှ ၂၈ ရက်နေ့အထိ တရုတ်ကွန်မြူနစ်ပါတီဗဟိုကော်မတီ နိုင်ငံရေးဦးဆောင်အဖွဲ့ ကော်မတီဝင်၊ တရုတ်ကွန်မြူနစ်ပါတီဗဟိုကော်မတီ နိုင်ငံခြား ရေးရာကော်မရှင်ရုံး ဥက္ကဋ္ဌ ဝမ်ယိ သည် အမေရိကန်နိုင်ငံသမ္မတ၏ အမျိုးသားလုံခြုံရေး အကြံပေး ဂျိတ်ဆူလီဗန် နှင့် မဟာဗျူဟာမြောက်ဆွေးနွေးပွဲကို ဘေကျင်းမြို့တွင် ကျင်းပ ခဲ့ရာ နှစ်ဦးနှစ်ဖက်တို့သည် ပွင့်လင်းမြင်သာစွာ၊ အနှစ်သာရရှိစွာ၊ အပြုသဘောဆောင်စွာ ဆွေးနွေးခဲ့ကြပါသည်။
ဝမ်ယိ က တရုတ်-အမေရိကန်ဆက်ဆံရေးသည် အတက်အကျနှင့် ကြုံခဲ့ရပြီး အတွေ့အကြုံနှင့် သင်ခန်းစာများကို စုပေါင်းသုံးသပ်လျှင် အနာဂတ်ကို ပိုမိုကောင်းမွန်စွာ ဖွင့်လှစ်ပေးနိုင်ရေး၊ တရုတ်-အမေရိကန်နိုင်ငံကြီးနှစ်နိုင်ငံအကြား မှန်ကန်သော ဆက်ဆံ ရေးလမ်းကြောင်း ရှာဖွေနိုင်ရေးအတွက် အကျိုးရှိကြောင်း၊ ပထမအချက်မှာ တရုတ်- အမေရိကန်ဆက်ဆံရေး လမ်းကြောင်းမှန်ကို ထိန်းသိမ်းရပြီး သော့ချက်မှာ နှစ်နိုင်ငံ ထိပ်သီးခေါင်းဆောင်များ၏ ဦးဆောင်မှု ဖြစ်ကြောင်း၊ တရုတ်-အမေရိကန်နှစ်နိုင်ငံတို့မှ အငြင်းပွားမှုနှင့် ထိပ်တိုက်ရင်ဆိုင်မှုများကို ရှောင်ကြဉ်ရပြီး သော့ချက်မှာ ပူးတွဲသတင်း ပြန်တမ်း ၃ ခုကို လိုက်နာဆောင်ရွက်ခြင်း ဖြစ်ကြောင်း၊ တတိယအချက်မှာ တရုတ်- အမေရိကန် အပြန်အလှန် ကူးလူးဖလှယ်မှု အဆင်ပြေချောမွေ့စွာ ဆောင်ရွက်ရပြီး သော့ချက် မှာ တန်းတူရည်တူ ဆက်ဆံခြင်း ဖြစ်ကြောင်း၊ စတုတ္ထအချက်မှာ တရုတ်-အမေရိကန် ဆက်ဆံရေး ခြေလှမ်းမှန်မှန်ဖြင့် ရေရှည်ဖွံ့ဖြိုးတိုးတက်ရပြီး သော့ချက်မှာ ပြည်သူ့ဆန္ဒ ဆိုင်ရာ အခြေခံအုတ်မြစ်ကို ပိုမိုခိုင်မာလာစေခြင်း ဖြစ်ကြောင်း၊ ပဉ္စမအချက်မှာ တရုတ်-အမေရိကန် နှစ်ဦးနှစ်ဖက်တို့သည် ငြိမ်းချမ်းစွာအတူယှဉ်တွဲနေထိုင်ရပြီး သော့ချက်မှာ မှန်ကန်သော သိရှိနားလည်မှု ရရှိခြင်း ဖြစ်ကြောင်း ပြောကြားခဲ့ပါသည်။
ဝမ်ယိ သည် အကြိမ် ၂၀ မြောက် တရုတ်ကွန်မြူနစ်ပါတီ ဗဟို ကော်မတီ တတိယအကြိမ် မျက်နှာစုံညီ အစည်းအဝေး၏ အနှစ်သာရများကို ရှင်းလင်းဖော်ပြခဲ့ပါသည်။ ဝမ်ယိ က ယခုအကြိမ်အစည်း အဝေးမှာ တရုတ်နိုင်ငံ ၏ ပြုပြင်ပြောင်းလဲရေးနှင့် တံခါးဖွင့်ရေးအတွက် အရေးကြီးသော မှတ်တိုင်သစ် ဖြစ်ပြီး တရုတ်နိုင်ငံကို နားလည်သဘောပေါက်ရန် ပြင်ပလောကအတွက် မြင်ကွင်းအသစ်ကို ထောက်ပံ့ပေးကာ နိုင်ငံအသီးသီးတို့၏ အတူတကွဖွံ့ဖြိုးတိုးတက်ရေး အတွက် အခွင့်အလမ်းအသစ်ကို ထောက်ပံ့ပေးကြောင်း အလေးထားပြောကြားခဲ့ပါသည်။
ဝမ်ယိ က ထိုင်ဝမ်ဒေသသည် တရုတ်နိုင်ငံ၏ အစိတ်အပိုင်း ဖြစ်ပြီး တရုတ်နိုင်ငံ တစ်ပေါင်းတစ်စည်းတည်းဖြစ်ရေးကို အကောင်အထည်ဖော်မည် ဖြစ်ကြောင်း၊ ထိုင်ဝမ် သီးခြားတည်ရှိရေးမှာ ထိုင်ဝမ်ရေလက်ကြား ငြိမ်းချမ်းတည်ငြိမ်ရေးအတွက် အကြီးဆုံး သော အန္တရာယ်ပင် ဖြစ်ကြောင်း၊ အမေရိကန်နိုင်ငံအနေဖြင့် ထိုင်ဝမ်သီးခြားတည်ရှိရေးကို မထောက်ခံသည့်ကတိပြုချက်ကို လက်တွေ့ကျအကောင်အထည်ဖော်ပြီး တရုတ်ပြည် တစ်ပြည်တည်းသာရှိရေးမူနှင့် တရုတ်-အမေရိကန်ပူးတွဲသတင်းပြန်တမ်း ၃ခုကို လိုက်နာ ဆောင်ရွက်ကာ ထိုင်ဝမ်ဒေသသို့ လက်နက်ရောင်းချမှုကို ရပ်စဲ၍ တရုတ်နိုင်ငံ၏ တစ်ပေါင်း တစ်စည်းတည်းဖြစ်ရေးကို ထောက်ခံသင့်ကြောင်း အလေးထားပြောကြားခဲ့ပါသည်။
ဝမ်ယိက အမေရိကန်နိုင်ငံအနေဖြင့် စီးပွားကုန်သွယ်ရေးနှင့် သိပ္ပံနည်းပညာ နယ်ပယ်များတွင် တရုတ်နိုင်ငံအား ဖိနှိပ်မှုကို ရပ်တန့်ပြီး တရုတ်နိုင်ငံ၏ တရားမျှတမှန်ကန်သည့် အကျိုးစီးပွား ထိခိုက်မှုများကို ရပ်တန့်သင့်ကြောင်း၊ ကုန်ထုတ်စွမ်းအားပိုလျှံမှုကို အကြောင်းပြပြီး ကိုယ်ကျိုးစီးပွားအကာအကွယ်ပေးရေး ပြုလုပ်လျှင် တစ်ကမ္ဘာလုံးအစိမ်းရောင် ဖွံ့ဖြိုး တိုးတက်ရေးကို ထိခိုက်ပြီး ကမ္ဘာ့စီးပွားရေးတိုးတက်မှုကို အနှောင့်အယှက်ပေးမည်သာ ဖြစ်ကြောင်း ပြောကြားခဲ့ပါသည်။
ဝမ်ယိ က တရုတ်နိုင်ငံအနေဖြင့် တောင်ပင်လယ်ကျွန်းများအပေါ် ပိုင်နက်နယ်မြေ အချုပ်အခြာအာဏာနှင့် အဏ္ဏဝါရေးရာအခွင့်အရေးကို အခိုင်အမာကာကွယ်ထိန်းသိမ်းပြီး တောင်ပင်လယ်ဆိုင်ရာ ဘက်အသီးသီးတို့၏ ဆောင်ရွက်ချက် ကြေညာစာတမ်း၏ တည်ကြည်လေးနက်မှုနှင့် ထိရောက်မှုကို အခိုင်အမာကာကွယ်ထိန်းသိမ်းကြောင်း၊ အမေရိကန်နိုင်ငံအနေဖြင့် နှစ်နိုင်ငံအကြားသဘောတူစာချုပ်ကို အကြောင်းပြပြီး တရုတ်နိုင်ငံ၏ အချုပ်အခြာအာဏာနှင့် ပိုင်နက်နယ်မြေတည်တံ့ပြည့်စုံမှုကို ထိခိုက်၍ မရကြောင်း၊ ဖိလစ်ပိုင်နိုင်ငံ၏ ကျူးကျော်ထိပါးမှုလုပ်ရပ်များကို ထောက်ခံအားပေး၍ မရကြောင်း အလေးထားပြောကြားခဲ့ပါသည်။
ဂျိတ်ဆူလီဗန် က အမေရိကန်-တရုတ်နှစ်နိုင်ငံအကြား သဘောကွဲလွဲမှုနှင့် ပြိုင်ဆိုင်မှု များ ရှိသည့်အပြင် ပူးပေါင်းဆောင်ရွက်ရန်နယ်ပယ်လည်း များစွာရှိကြောင်း၊ နှစ်နိုင်ငံ အကြား တန်းတူရည်တူ ဆက်ဆံပြီး ပြိုင်ဆိုင်မှုသည် တရားမျှတသင့်သည်ဟု သဘောတူညီကြောင်း၊ အမေရိကန်နိုင်ငံအနေဖြင့် တရုတ်နိုင်ငံနှင့် ချိတ်ဆက်မှုကို ဖြတ်တောက်ရန် ဆန္ဒမရှိကြောင်း၊ အမေရိကန်နိုင်ငံသည် တရုတ်ပြည်တစ်ပြည်တည်းသာ ရှိရေးမူဝါဒကို စွဲကိုင်ထားပြီး ထိုင်ဝမ်သီးခြားတည်ရှိရေးကို မထောက်ခံကြောင်း၊ တရုတ်ပြည် နှစ်ပြည်ကို မထောက်ခံကြောင်း၊ တရုတ်တစ်ခု၊ ထိုင်ဝမ်တစ်ခုကို မထောက်ခံကြောင်း၊ အမေရိကန်နိုင်ငံနှင့် တရုတ်နိုင်ငံတို့သည် ကမ္ဘာမြေပေါ်တွင် ရေရှည် ငြိမ်းချမ်းစွာ အတူယှဉ်တွဲနေထိုင်ကြမည် ဖြစ်ပြီး အမေရိကန်နိုင်ငံ၏ မူဝါဒရည်မှန်းချက်မှာ အမေရိကန်- တရုတ်ဆက်ဆံရေး ဆက်တိုက်ဖွံ့ဖြိုးတိုးတက်နိုင်သော နည်းလမ်းကို ရှာကြံရန်ပင် ဖြစ် ကြောင်း၊ အမေရိကန်နိုင်ငံအနေဖြင့် တရုတ်နိုင်ငံနှင့် မဟာဗျူဟာမြောက်ဆက်သွယ်ရေးကို ဆက်လက်ထိန်းသိမ်းထားပြီး အပြန်အလှန်သိရှိနားလည်မှုကို တိုးပွားစေကာ အထင် လွဲမှားမှုများကို လျှော့ချရန် ဆန္ဒရှိကြောင်း ပြောကြားခဲ့ပါသည်။
နှစ်ဦးနှစ်ဖက်တို့သည် ယူကရိန်းပြဿနာ၊ အရှေ့အလယ်ပိုင်းပြဿနာနှင့် ကိုရီးယား ကျွန်းဆွယ်ပြဿနာစသည်တို့နှင့်ပတ်သက်ပြီး အမြင်ချင်းဖလှယ်ခဲ့ကြပါသည်။ နှစ်ဦး နှစ်ဖက်တို့သည် မကြာမီတွင် နှစ်နိုင်ငံထိပ်သီးခေါင်းဆောင်များ၏ အပြန်အလှန် ဆက်သွယ်မှုသစ်နှင့် ပတ်သက်ပြီး ဆွေးနွေးခဲ့ကြပါသည်။
