• ဆက်သွယ်ရန်•  မြန်မာဘာသာဌာနအကြောင်း
   

မမြင်ခဲ့ရသောနှင်းနှင့်မဟာတံတိုင်းပေါ်မှအတွေး

(GMT+08:00) 2013-08-21 18:13:27

(၁)

တရုတ်နိုင်ငံသို့ရောက်ခဲ့ဖူးသည့်နှစ်ကြိမ်စလုံးတွင် နံနက်ခင်းရောက်တိုင်း ပထမဦးဆုံးတည်ခင်းသည့်အရာမှာစိမ့်ကနဲဝင်လာသော အအေးဓါတ်ဖြစ်သည်။ပထမတစ်ခေါက်ကအောက်တိုဘာ၊ဒုတိယအခေါက်ကဒီဇင်ဘာမို့ အနွေးထည်နှစ်ထပ်ဝတ်ထားတာတောင် အအေးသည်စိမ့်မြဲ။လေတစ်ချက်အဝေ့တွင် အအေးဓါတ်ကပိုရောက်လာသည်။ခပ်စိမ့်စိမ့်အအေးဓါတ်ကြား လမ်းလျှောက်ရသည်မှာ ကျွန်တော့်စိတ်ကြိုက်။

အအေးဓါတ်ကိုကြုံရတော့ နှင်းကိုသတိရမိသည်။တရုတ်ရောက်မနက်ခင်းတိုင်းတွင် သတိတရလိုက်လံရှာဖွေမိသည်မှာ နှင်းဖြစ်သည်။နှင်းကိုကျွန်တော်ချစ်ခဲ့သည်မှာ လွန်ခဲ့သောအနှစ်၂၀ခန့် ကတည်းကဖြစ်သည်။နှင်းကိုချစ်တတ်လာအောင် ခံစားပြခဲ့သူမှာ တရုတ်ပြည်သစ်၏ဖခင် ကဗျာဆရာမော်စီတုန်းဖြစ်သည်။

မော်စီတုန်းမှာ နှင်းကိုအရူးအမူးချစ်တတ်သူ၊နံနက်ခင်း၊ခြံဝင်းတစ်ခုလုံး ဖွေးဖွေးလှုပ်နေသော နှင်းများအား သူ့ကိုယ်ရံတော်ကလှည်းကျင်းလိုက်သည်ကိုမကြိုက်။ဒီအတိုင်းထားလိုက်ပါဟု မော်ကပြောသည်။

နံနက်ခင်း နှင်းပွင့်များကျလာသံနှင့်ငှက်ကလေးတို့၏ ချိုသောအသံများကြားတွင်အချိန်အတန်ကြာ သူငေးကြည့်လေ့ရှိသည်တဲ့။နှင်းတွေကြားထဲအရူးအမူးပျော်ဝင်ခဲ့ခြင်းကြောင့်ထင်၏။မော်စီတုန်း၏နှင်းကဗျာမှာကျွန်တော်တို့ကို ဖမ်းစားခဲ့သည်။ ''တောင်တန်းတို့သည် ကနေသောငွေမြွေများပင်'' ဟုမော်စီတုန်းကဖွဲ့ခဲ့သည်။

မြို့ပြ၏နံနက်ခင်းများတွင် နှင်းကိုမတွေ့ရ။နံနက်ခင်းရောက်တိုင်း မချင့်မရဲစိတ်ဖြင့်သာ သက်ပြင်းကိုတွင်တွင်ချခဲ့ရသည်။ကမ္ဘာကျော် မဟာတံတိုင်းဆီသို့သွားမည်။အအေးဓါတ်သည်လည်း ပိုကဲမည်ဆိုတော့ နှင်းကိုမြင်ရနိုး ကျွန်တော်ဆက်ရင်ခုန်မိသည်။

မဟာတံတိုင်း၏အအေးဓါတ်မှာ သုညဒီဂရီအောက်သို့ပင်ရောက်ရှိနေသည်။နှင်းမိုးများပင်ခပ်ဖွဲဖွဲဖြန်းလာသဖြင့် မိုးကာကိုကဗျာကရာကောက်ခြုံလိုက်ရသည်။အဝေးကိုလှမ်းကြည့်လိုက်တော့ မဟာတံတိုင်းမှာ ရစ်ခွေနေသောမြစ်တစ်စင်းပမာ ။နာမည်ကျော် နှင်း သာရှိနေပါက "မဟာတံတိုင်းသည် ကနေသောငွေမြွေများပင်" ဟုဖွဲ့ဆိုရမည်ထင်၏။ယခုတော့အုံ့ဆိုင်းနေသော မြူများကြားတွင် မဟာတံတိုင်းသည် မှိုင်းပြလို့။နှင်းကိုမမြင်ရသော်ငြား ထိုမြင်ကွင်းကိုကျွန်တော်ရင်ခုန်နေမိသည်။

သုညဒီဂရီအောက်ရောက်နေသော အအေးဓါတ်ကိုပင်သတိမရ။မိတ်ဆွေများကခပ်သွက်သွက်ဆိုတော့မှ ခြေထောက်ကိုအထက်သို့ခပ်သွက်သွက်မော့လိုက်ရသည်။မဟာတံတိုင်း၏ကင်းမျှော်စင်တစ်ခုသို့ရောက်တော့ သုညဒီဂရီအောက်တွင်ချွေးများပင်စို့လို့။

မဟာတံတိုင်း၏အဆုံးသို့ရောက်ဖို့ဆိုလျှင် မည်မျှကြာမည်မသိ။ ရှေ့တွင်လှေကားထစ်များက ဖိတ်ခေါ်လျှက်ရှိသည်။ ကီလိုမီတာ၂၄၀၀ရှည်သောတံတိုင်းကြီး။မြောက်ဘက်���ှအရိုင်းအစိုင်းများ၏အန္တရာယ်ကိုကာကွယ်ရန်တဲ့။ချင်မင်းဆက်၏ပထမဦးဆုံးဘုရင် ရှီဝမ်တီ ကစတင်တည်ဆောက်ခဲ့သည်။သမိုင်းမှတ်တမ်းအရဘီစီ၃ရာစု။အပြီးသတ်အဆင့်တော့မဟုတ်။နောင်နှစ်ပေါင်းများစွာ အေဒီ၁၅နှင့်၁၆ရာစုတွင် မင်မင်းဆက်ကမွန်ဂိုအန္တရာယ်ကာကွယ်ရန်အတွက်ထပ်တည်ဆောက်ခဲ့သည်တဲ့။

၁၉၈၇ခုနှစ်ကိုရောက်တော့ယူနက်စကိုအဖွဲ့ကမဟာတံတိုင်းကိုကမ္ဘာ့ရှေးဟောင်းအမွအနှစ်တစ်ခုအဖြစ်ထုတ်ပြန်ခဲ့သည်။မဟာတံတိုင်း၏ကျော်ကြားမှုကကမ္ဘာအနှံ့။ထို့ကြောင့် တရုတ်ရောက်လျှင် မဟာတံတိုင်းသို့အရောက်လ���ကြသည်။နိုင်ငံခြားဧည့်တို့သည် မဟာတံတိုင်း၏ကြီးကျယ်ခမ်းနားမှုကို ငေးလို့မဆုံး။

ကျွန်တော်တို့ရောက်ရှိသွားချိန်တွင် ပြည်ပဧည့်များကိုတွေ့ရသလို တရုတ်လူမျိုးတို့သည်လည်းခပ်များများ။ဒုတိယတစ်ကွေ့သို့ဆက်တက်ကြမည်ဆိုတော့ လက်ကလေးလှုပ်ရုံစာရေးခြင်းဖြင့်သာ အသားကျနေသည့်အတွက်ကျွန်တော့်ခြေထောက်မှာတွန့်လာသည်။

ကျွန်တော့ရှေ့တွင်တော့ အရယ်အမောမပျက် စကားများဖောင်ဖွဲ့လို့လူငယ်တို့နှင့်အပြိုင်လှမ်းတက်နေသော တရုတ်အဖိုးလေးတစ်သိုက်ကိုမြင်တွေ့လိုက်ရသည်။သူတို့၏အသက်အရွယ်မှာ၆၀နှစ်ဝန်းကျင်ခန့်ရှိမည်ထင်၏။သူတို့၏မျက်နှာများမှာအားမာန်အပြည့်။သူတို့၏ခြေထောက်များမှာခပ်သွက်သွက်။

ဒုတိယကင်းမျှော်စင်ကိုရောက်တော့ နောက်တစ်ကွေ့ဆိုသည်ကို ကျွန်တော်လက်လျှော့လိုက်တော့သည်။ မည်သည့်နေရာတွင်ဆုံးမည်မသိသော မဟာတံတိုင်းကို ငေးလိုက်။တရုတ်လူမျိုးတို့၏မျက်နှာကိုငေးလိုက်။ခြေပစ်လက်ပစ်ပင် ကျွန်တော်ဆက်သာယာမိပြန်သည်။

ကင်မရာမှန်ဘီလူးကို အနီးကပ်ဆွဲယူလိုက်တော့ ရှေ့မှတက်သွားသော တရုတ်အဖိုးလေးတို့မှာ နောက်တစ်ကွေ့သို့ပင် ရောက်တော့မည်ကိုတွေ့ရ၏။မကြာမီရယ်သံမောသံများဖြင့် တက်လာသောတရုတ်လူငယ်များကို မြင်တွေ့ရပြန်သည်။သူတို့က အသက်၂၀ကျော်အရွယ် တရုတ်မျိုးဆက်သစ်လူငယ်များဖြစ်သည်။သူတို့သည်လည်းပျော်ရွှင်မှုအပြည့်၊သူတို့၏ခြေထောက်များသည်လည်း ခပ်သွက်သွက်ပင်ဖြစ်သည်။
          

 (၂)

မဟာတံတိုင်းမှအပြန် မမြင်လိုက်ရသော နှင်း ကိုလက်လျှော့လိုက်ပြီးနောက် ကျွန်တော့ကိုအဓိကဆွဲဆောင်နေသည့်အရာမှာ တရုတ်တို့၏သွားလာလှုပ်ရှားမှုဟန်ပန်ဖြစ်သည်။သူတို့၏ခြေလှမ်းများမှာအလုပ်သွားတော့လည်းသုတ်သုတ်၊အလုပ်မှပြန်တော့လည်း သုတ်သုတ်၊ညပိုင်းအနားယူချိန်မျိုးတွင်တောင် ခပ်သုတ်သုတ်သွားလာနေမှုကို အတွေ့များခဲ့သည်။

ခရီးသွားဖော်တစ်ဦးက မိုးမျှော်တိုက်များကိုငေးမောကာ တရုတ်တို့ဘာလို့ချမ်းသာလာတာလဲ ဟုမေးခွန်းထုတ်သည်။
ကျွန်တော်ကတရုတ်တို့၏စရိုက်လက္ခဏာတစ်ခုဖြစ်သော စားသုတ်သုတ် သွားသုတ်သုတ်နှင့်အလုပ်နှင့် လက်မပြတ်ခြင်းသည် ချမ်းသာလာမှုအတွက်အထောက်အပံ့ကောင်းတစ်ခုဟုမြင်ကြောင်းပြောပြမိသည်။

တရုတ်နိုင်ငံမှတရုတ်လူမျိုးမှမဟုတ်။မြန်မာနိုင်ငံမှတရုတ်တို့သည်လည်း အလုပ်နှင့်လက်မပြတ်။မဟာတံတိုင်းပေါ်တွင်တွေ့ခဲ့ရသော ခပ်သွက်သွက်လျှောက်နေသည့်တရုတ်အဖိုးလေးများလို ရန်ကုန်မြို့မှ ကျွန်တော့်မိတ်ဆွေ တရုတ်ကြီးတစ်ဦးသည်လည်း ယနေ့အသက်၇၀နီးသည့်တိုင် စားသုတ်သုတ်သွားသုတ်သုတ်နှင့်အလုပ်နှင့်လက်မပြတ်ဆဲဖြစ်သည်။

ကျွန်တော့်မိတ်ဆွေကြီးမှာ မြန်မာနိုင်ငံသားတရုတ်လူမှိုးစစ်စစ်၊သူ လူပျိုပေါက်အရွယ်တွင် တောမှရန်ကုန်မြို့ပေါ်သို့ လက်ဗလာသက်သက်တက်လာသူ၊ပထမ၊ အလုပ်မျိုးစုံလုပ်။ဒုတိယ၊လေးဘီးကားအငှားယဉ်မောင်း။တတိယ၊လေးဘီးကားပိုင်ရှင်ဖြစ်လာ။စတုတ္ထ၊ဆေးဆိုးပန်းရိုက်လုပ်ငန်းရှင်။ထို့နောက်ယနေ့တိုင် လုပ်ငန်းစုံဖြင့်ကြွယ်ဝနေသည်မှာကြာပြီ။

ကျွန်တော်နှင့်တစ်လမ်းတည်းနေသည့်အချိန်တွင်ထိုမိတ်ဆွေကြီးမှာ ဆေးဆိုးပန်းရိုက်လုပ်ငန်းကို လုပ်နေပြီဖြစ်သည်။သူ့ခန္ဒာကိုယ်ပေါ်တွင်စွပ်ကျယ်ခပ်နွမ်းနွမ်းတစ်ထည်ကိုသာ ထာဝစဉ်တွေ့ရမြဲဖြစ်သည်။ သူနှင့်ကျွန်တော်၁၀နှစ်ကျော်တစ်လမ်းတည်းနေခဲ့ရာတွင်သူအင်္ကျီကောင်းကောင်းဝတ်ထားသည်ကို၁၀ကြိမ်ခန့်ပင်မတွေ့ဖူး။သူ့လုပ်ငန်းတွင်သူရော သူ့သားသမီးများပါ အလုပ်သမားများနှင့်တန်းတူ အလုပ်လုပ်နေမြဲဖြစ်သည်။ ပြီးတော့၊လမ်းအတွင်းသာရေးနာရေး လူမှုရေးကိစ္စများတွင်လည်း ငွေအားရောလူအားပါ ထိပ်ဆုံးမှ တက်ကြွစွာ ပါဝင်သူမို့ အားလုံးကအလေးအနက်ပြုရသူဖြစ်သည်။

သူမှမဟုတ်။ကျွန်တော့်သူငယ်ချင်းတစ်ဦးသည်လည်း တရုတ်စစ်စစ်။ လူငယ်မို့ အိမ်အပြင်ထွက်လျှင် ဘော်ကျော့ပုံစံမျိုးမြင်တွေ့ရသော်လည်း သူ့အိမ်တွင်မူ အလုပ်နှင့်လက်မပြတ်။သူ့ဖခင်ဖွင့်လှစ်ထားသော ကြေးအိုးဆိုင်တွင် ကြေးအိုးချက်တာကအစ၊စားပွဲထိုးသည်အထိ စွယ်စုံအလုပ်သမားဖြစ်သည်။
လူငယ်ဖြစ်သော်ငြား စားပွဲထိုးရသည်ကို ရှက်စရာဟု သူမမြင်။အလုပ်ဟူသမျှ ဂုဏ်ရှိစွသည် တရုတ်တို့၏အသွေးအသားထဲသို့မွေးရာပါစီးဝင်နေပုံရသည်။ထို့ကြောင့် သူတို့ချမ်းသာလာခြင်းဟုကျွန်တော်နားလည်မိသည်။

တိတ်ရှောင်ဖိန်ခေတ် နိုင်ငံရေးတည်ငြိမ်မှုနှင့် ဈေးကွက်အဖွင့်တွင် တရုတ်စီးပွားရေးသည် အံ့ဘနန်းတိုးတက်လာခဲ့သည်။မည်မျှအထိမှန်မမှန်တော့မသိသေး။ ကမ္ဘာကျော် ဘောဂဗေဒပညာရှင် ဂိုးလ်ဒ်မင်းဆာ့ခ်ျ က၂၀၂၇ခုနှစ်တွင် တရုတ်သည်အမေရိကန်ကိုကျော်လွှားကာကမ္ဘာအကြီးဆုံးစီးပွားရေးနိုင်ငံကြီးဖြစ်လာမည်ဟု ဟောကိန်းထုတ်ထားသည်။
                                                          ရှင်းသန့်

   Webradio